नगरसेवक मोहसीन मिर्झा यांना परभणी सत्र न्यायालयाकडून जामीन मंजूर

कळंब : कळंबचे नगरसेवक मोहसीन मिर्झा यांना परभणी येथील जिल्हा व सत्र न्यायालयाने मंगळवारी जामीन मंजूर केला आहे. या प्रकरणात अ‍ॅड. एजाज सय्यद यांनी न्यायालयात मोहसीन मिर्झा यांची बाजू भक्कमपणे मांडली. या निर्णयामुळे मोहसीन मिर्झा यांना मोठा दिलासा मिळाला असून, त्यांच्या समर्थकांमध्ये या निकालाची चर्चा सुरू झाली आहे.

मिळालेल्या माहितीनुसार, ड्रग्स प्रकरणातील आरोपी शाहरुख पठाण याच्यासोबत फोनवरून संवाद साधल्याचा तसेच ऑनलाइन आर्थिक व्यवहार केल्याचा आरोप मोहसीन मिर्झा यांच्यावर करण्यात आला होता. मात्र, मोहसीन मिर्झा यांच्याकडे या प्रकरणाशी संबंधित कोणतीही आक्षेपार्ह वस्तू आढळली नसल्याचा दावा करण्यात येत होता. या पार्श्वभूमीवर न्यायालयीन प्रक्रियेकडे सर्वांचे लक्ष लागले होते.

मोहसीन मिर्झा हे कळंबच्या राजकारणात सक्रिय असून, त्यांच्यावर करण्यात आलेल्या आरोपांमुळे स्थानिक राजकीय वर्तुळात विविध चर्चा सुरू होत्या. राजकीय द्वेषातून  या प्रकरणात अडकवण्यात आल्याची चर्चा  होत होती. मात्र, या आरोपांबाबत अंतिम निष्कर्ष काढण्यापूर्वी न्यायालयीन प्रक्रियेचा विचार करणे महत्त्वाचे आहे.

दरम्यान, कळंब पोलीस ठाण्यातील संबंधित प्रकरणात मोहसीन मिर्झा यांच्या जामिनाबाबत बुधवारी औरंगाबाद खंडपीठात सुनावणी होणार असल्याचे सांगण्यात येत आहे. त्यामुळे या सुनावणीत न्यायालय काय निर्णय देते, याकडे आता कळंबसह संपूर्ण परिसराचे लक्ष लागले आहे.

परभणी जिल्हा व सत्र न्यायालयाच्या जामीन निर्णयानंतर मोहसीन मिर्झा यांना दिलासा मिळाला असला, तरी पुढील न्यायालयीन प्रक्रियेत काय घडते, हे पाहणे महत्त्वाचे ठरणार आहे.