मुख्यमंत्री देवेंद्र फडणवीस यांची औरंगजेबसोबत तुलना; एकनाथ शिंदे संतापले
औरंग्या तुमचा नातेवाईक आहे का? : एकनाथ शिंदे
मुंबई : उपमुख्यमंत्री एकनाथ शिंदे यांनी आज नागपूर येथे झालेल्या हिंसाचार प्रकरणावर बोलताना संतप्त प्रतिक्रिया दिली आहे. इतकंच नाही तर काँग्रेसचे प्रदेशाध्यक्ष हर्षवर्धन सपकाळ यांनी मुख्यमंत्री देवेंद्र फडणवीस यांची तुलना औरंगजेब याच्याशी केली होती. याबद्दल बोलताना त्यांनी फडणवीसांची बाजू घेत चांगलंच सुनावलं. औरंगजेब हा देशद्रोही होता. तो काय तुमचा नातेवाईक आहे का? असा प्रश्न देखील त्यांनी उपस्थित केला.
काय म्हणाले एकनाथ शिंदे?
हर्षवर्धन सपकाळ यांनी मुख्यमंत्री देवेंद्र फडणवीस यांची तुलना क्रूर प्रशासक म्हणून औरंगजेबाशी केली. औरंगजेब हा देशद्रोही होता. त्याने धर्मवीर संभाजी महाराज यांचा छळ केला, त्यांचे डोळे काढले, जीभ छाटली. मुख्यमंत्रांनी सपकाळ यांची
जीभ छाटली का? डोळे काढले का? चांबडी सोलली का? असे प्रश्न शिंदे यांनी उपस्थित केले. तुम्ही कोणाची तुलना कोणाशी करत आहात? असा प्रश्न त्यांनी काँग्रेसला विचारला. छत्रपती शिवाजी महाराजांची तुलना तुम्ही औरंगजेबाशी करता का? तुमचे काय चालले? असेही शिंदे यांनी नाना पटोले यांना विचारले आहे. तुमचे अध्यक्ष हर्षवर्धन सपकाळ यांनी माफी मागायला हवी. अन्यथा ते औरंगजेबाचे समर्थन करत असल्याने तेही देशद्रोही ठरत असल्याचे शिंदे यांनी म्हटले आहे.
गेल्या काही दिवसापासून राज्यामध्ये औरंगजेबाचे
उदात्तीकरण का सुरू आहे? कोणी सुरू केले कशासाठी सुरू केले? त्याच्या मुळाशी सरकार जाणारच असल्याचे शिंदे यांनी म्हटले आहे. मात्र, औरंगजेब हा चांगला प्रशासक होता, शिवाजी महाराजांसारखा होता, अशी तुलना अबू आझमी यांनी केली होती. त्याच वेळी आझमी यांना समज दिली होती. मात्र, औरंगजेबाचे उदात्तीकरण योग्य आहे का? हा माझा प्रश्न असल्याचे एकनाथ शिंदे यांनी म्हटले आहे.
